Af hverju skiptir máli að hugsa um ágengar plöntutegundir?

Ágengar plöntutegundir geta haft margvísleg neikvæð áhrif á:

• Vistkerfið
• Líffræðilegan fjölbreytileika
• Landslagið
• Einkalóðir
• Samfélagið

Dæmi um neikvæð áhrif

• Ágengar plöntutegundir leggja svæðin undir sig og eyða gróðri sem fyrir er. Aðrar plöntutegundir hopa og geta horfið alveg.
• Útbreiðsla ágengra plöntutegunda getur leitt til verulegra breytinga á dýralífi, bæði smádýra og fugla.
• Ágengar plöntutegundir geta hamlað útivist þar sem þær geta vaxið yfir stíga og falið landslag.
• Ágengar plöntutegundir vaxa þétt í miklum breiðum og mynda sinu sem safnast upp. Veruleg eldhætta getur skapast.

Líffræðilegur fjölbreytileiki

Að viðhalda líffræðilegum fjölbreytileika er mikilvægur þáttur í að viðhalda lífsgæðum okkar á jörðinni. Auðlindir og náttúrulegir ferlar sem eru okkur lífsnauðsynlegir byggjast á því að líffræðileg fjölbreytni sé til staðar.

Að uppræta ágengar tegundir snýst ekki um að stöðva breytingar eða íhaldssemi heldur snýst þetta um lífsgæði og framtíð okkar á jörðinni.  Nánar á heimasíðu Náttúrufræðistofnunar Íslands.

Aðildarríki að Samningi Sameinuðu þjóðanna um líffræðilega fjölbreytni skulu koma í veg fyrir innflutning óæskilegra framandi tegunda sem geta ógnað upprunalegum vistkerfum, búsvæðum eða tegundum. Einnig ber þeim að hafa stjórn á uppgangi þeirra eða uppræta þær.

Verum meðvituð um ágengar tegundir

Við hvetjum alla til þess að láta sig varða líffræðilegan fjölbreytileika og vera meðvituð um ágengar tegundir og útbreiðslu þeirra.